या आठवड्यात कोणत्या राशीच्या धनस्थानात प्रवेश होणार

या आठवड्यात कुठल्या राशींचा भाग्योदय होणार? कुठल्या राशींना परदेश प्रवास घडणार? कुठल्या राशींना त्रास होणार, पाहूया या आठवड्याचे राशिभविष्य (Weekly Horoscope – 21 November to 27 November)

मेष – राशी स्वामी मंगळाचा आपल्या राशीच्या धनस्थानात प्रवेश झाला आहे. तर सप्तम स्थानातील केतू वरून चंद्राचे भ्रमण होत आहे. आपल्या हट्टी स्वभावाला लगाम घालून कुटुंबीयांच्या विचारांचा आदर केलात तर फायदा होईल. स्थानावर मालमत्तेच्या व्यवहारातून आवक होईल. त्यामुळे या आठवड्यात आपणास योग्य आर्थिक नियोजन करता येईल. मात्र अनोळखी व्यक्तींवर विश्वास ठेवून कोणतेही व्यवहार करू नयेत. दुसऱ्याच्या मताशी सहमत होऊन आपले काम योग्य पद्धतीने गोड बोलून साध्य करून घ्यावे. शेजाऱ्यांशी अतिसलगी अथवा वाद टाळावेत. अष्टम पाण्यातून रवी, बुध, शुक्र व चंद्राचे होणारे भ्रमण प्रकृती अस्वास्थ देणारे राहील. मधुमेह, रक्तदाब तसेच संसर्गजन्य विकारांचा त्रास संभवतो. उत्तरार्धात प्रवासयोग घडतील.

शुभ दिनांक -25 ते 27

वृषभ – आपल्या राशीतून मंगळाचे तर सप्तम स्थानातून रवी, बुध, शुक्राचे भ्रमण होत आहे. आपल्या कामातील योग्य मांडणी व सुबकपणा याचे कौतुक होईल. अंगभूत कला गुणांना चांगला भाव मिळेल. आनंदी व निश्चयी वृत्तीने केलेल्या कामामुळे चांगली यशप्राप्ती लाभेल. महत्त्वाच्या कागदपत्रांची पूर्तता झाल्यामुळे भागीदारी व्यवसायातून उत्तम भरभराट होईल. जनसंपर्कात वाढ होऊन चांगली प्रगती होईल. जोडीदाराचे चांगले सहकार्य लाभेल. विवाहेच्छूक तरुणांना सुयोग्य जोडीदार मिळेल. उत्तरार्धात प्रवास घडतील. वाहनाच्या वेगावर नियंत्रण ठेवावे.

शुभ दिनांक 23 ते 25

मिथुन – पंचमस्थानातील केतूवरून चंद्राचे भ्रमण होत आहे. जुन्या मैत्रीला उजाळा मिळेल. मित्रपरिवाराबरोबर मनोरंजनाच्या कार्यक्रमात सहभागी व्हाल. आपल्या विनोद प्रिय व खेळकरवृत्तीमुळे मित्रांमध्ये आपले स्थान निर्माण कराल. नोकरी व्यवसायात स्त्री अधिकारी सहकाऱ्यांकडून फायदा होईल. आपल्या कामाची वरिष्ठांकडून प्रशंसा होईल. कोर्ट कचेरीच्या कामातून फायदा होईल. रेंगाळलेली सरकारी कामे ओळखीतून पूर्ण करता येतील. मामा मावशीचे सहकार्य लाभेल. सर्दी, खोकल्याचा त्रास जाणवेल. चैनीच्या वस्तूंची खरेदी केली जाईल. लेखकांच्या हातून दर्जेदार लिखाण होईल.

शुभ दिनांक – 21 ते 23

कर्क – आठवड्याच्या सुरुवातीला आपल्या राशीच्या सुखस्थानातील केतूवरून चंद्राचे भ्रमण होत आहे. कुटुंबीयांच्या मतांशी सहमत राहिलात तर घरातील वातावरण आनंदी राहण्यास मदत होईल. कुटुंबात धार्मिक शुभ समारंभाचे आयोजन केले जाईल. अध्यात्मिक प्रगती होईल. आपले छंद जोपासण्यासाठी वेळ देता येईल, मात्र अति विचाराने समोर आलेली संधी दवडू नका. अंगभूत कलागुणांना चांगला वाव मिळेल. गायक, कवी, कलाकार यांना आपले कला कौशल्य दाखवता येईल. उच्च शिक्षणासाठी परदेशी जाण्याचे प्रयत्न करत असणाऱ्या विद्यार्थ्यांना यश लाभेल. उत्तरार्धात प्रकृतीच्या तक्रारींकडे दुर्लक्ष करू नका. अति विचार टाळावा.

शुभ दिनांक – 23, 24

सिंह – पराक्रमस्थानातून चंद्राचे तर सुखस्थानातून रवी, शुक्र, बुधाचे भ्रमण होत आहे. या आठवड्यात आपण सतत कार्यतत्पर, आनंदी, उत्साही राहणार आहात. अनेकांच्या गाठीभेटीतून कामाचा व्याप वाढवण्यात यश येईल. आपल्या उत्तम कार्यशक्ती आणि निर्णय क्षमता या गुणांचा आपल्याला फायदा होणार आहे. गृह सुशोभीकरणासाठी आकर्षक शोभेच्या वस्तूंची खरेदी केली जाईल. नवीन वाहन वास्तू खरेदीचे योग आहेत. सहकाऱ्यांनी केलेल्या कामाचे मनापासून कौतुक कराल. उत्तरार्धात संतती संबंधी सुवार्ता कानी येतील. आपली इच्छापूर्ती होईल.

शुभ दिनांक – 25 ते 27

कन्या – आपल्या चिकित्सक, चौकस स्वभावामुळे आर्थिक नुकसान टळणार आहे. जुनी व्यावसायिक येणी वसूल होतील. आपल्या अस्तित्वामुळे घरात चैतन्याचे वातावरण राहील. उत्साहाच्या भरात आपली कौटुंबिक कामे पूर्ण कराल. मानसिक ताण-तणाव दूर झाल्याने मनस्वस्थ लाभेल. कुटुंबात धार्मिक कार्याचे आयोजन केले जाईल. भावंडांचे चांगले सहकार्य लाभेल. दैनंदिन जीवनातून विरंगुळा शोधाल. सहलीचे आयोजन केले जाईल. विद्यार्थ्यांना संशोधनात्मक अभ्यासक्रमातून चांगली प्रगती साधता येईल. आप्तस्वकियांच्या गाठीभेटी होतील. प्रकृती स्वास्थ्य चांगले राहील, तरी पथ्य पाण्याकडे दुर्लक्ष नको.

शुभ दिनांक – 22, 23

तूळ – आपल्या राशीतील केतू वरून आठवड्याच्या सुरुवातीला चंद्राचे भ्रमण होत आहे. अध्यात्मिक क्षेत्रात प्रगती होईल. धनस्थानातील रवी, बुध आणि शुक्र आपला आर्थिक आलेख उंचावणार आहेत. आनंदी आणि मित्र प्रिय अशी आपली रास असल्याने मित्रांसोबत आनंदी वातावरणात आठवड्याची सुरुवात होईल. स्वतःबरोबर दुसऱ्याचाही फायदा करून दिल्यामुळे सामाजिक पत उंचावणार आहे. घरासाठी आकर्षक, शोभेच्या वस्तूंची खरेदी केली जाईल. आपल्या संभाषण चातुर्याच्या जोरावर रेंगाळलेली कामे मार्गी लागतील. उत्तरार्धात कामानिमित्त प्रवास घडणार आहेत. भावंडांच्या गाठीभेटीतून आनंद मिळेल. राजकारण, समाजकारण यासारख्या क्षेत्रात सक्रिय सहभाग घ्याल. आपल्या मतांचा आदर केला जाईल.

शुभ दिनांक – 21, 22

वृश्चिक – आपल्या राशीच्या वेळेस स्थानातील केतूवरून चंद्राचे भ्रमण होत आहे तर सप्तम स्थानात मंगळाने प्रवेश केला आहे. तर राशीतील रवी, बुध, शुक्र आपले कर्तृत्व उजळून टाकणार आहेत. कामाचा मोठा आवाका पार पाडाल. कोणत्याही अडचणींना न जुमानता यश खेचून आणाल. आपल्या निर्णयाची इतरांकडून अंमलबजावणी करून घ्याल. सामाजिक पतप्रतिष्ठा उंचावेल. उंची वस्त्रालंकारांची खरेदी केली जाईल. भागीदारी व्यवसायातून नवीन कार्यारंभ केले जातील. जोडीदाराचे चांगले सहकार्य लाभेल. आठवड्याच्या उत्तरार्धात पूर्वी केलेल्या गुंतवणुकीतून लाभ होतील. कोर्ट कचेरीच्या कामातून यश लाभेल.

शुभ दिनांक – 23, 24

धनु – राशीच्या लाभस्थानातील केतूवरून चंद्राचेे भ्रमण होत आहे. अनोळखी व्यक्तीवर विश्वास ठेवून कोणतेही काम करू नका. गुंतवणूक करताना योग्य व्यक्तीचे मार्गदर्शन घ्यावे. पूर्वी केलेल्या गुंतवणुकीतून लाभ होतील. अविचाराने कोणतेही निर्णय घेऊ नका. धार्मिक स्थळांना भेटी द्याल. अध्यात्मिक प्रगती होईल. आपल्या आचार विचारात अस्थिरता ठेवू नका. हाती घेतलेले काम जबाबदारीने पार पाडावे. सामाजिक पत उंचावेल अशी खरेदी केली जाईल. अत्याधुनिक तंत्रज्ञानाचा व्यवसायात वापर करणे सहज शक्य होईल. धाडस आणि उत्तम कर्तृत्व या आपल्या गुणांचा या आठवड्यात आपल्याला फायदा होणार आहे.

शुभ दिनांक – 26, 27

मकर – आपल्या राशीच्या दशम स्थानातील केतूवरून चंद्राचे भ्रमण होत आहे. नोकरी व्यवसाय कोणावरही विश्वास न ठेवता आपले काम स्वतःच पूर्ण करावे. द्विधा मनस्थिती झाल्यामुळे एखादा निर्णय स्पष्टपणे घेता येणार नाही‌. लाभस्थानातील रवी, बुध, शुक्र आपणास अनुकूल फलदायी आहेत. आपल्या अंगभूत कलागुणांना चांगला वाव मिळेल. लेखकांच्या हातून दर्जेदार लिखाण होईल. कवी, कलाकार, गायक यांना श्रोत्यांची वाहवा मिळेल. आपल्या दीर्घोद्योगी आणि व्यवहारी स्वभावामुळे व्यवसाय उद्योगातील कामाचा चांगला मोबदला मिळेल. नवीन संधी चालून येतील. उत्तरार्धात कामानिमित्त प्रवास घडतील.

शुभ दिनांक – 24, 25

कुंभ – भाग्यस्थानातील केतूवरून होणारेे चंद्राचे भ्रमण आपल्या आध्यात्मिक प्रगती वाढवणारे राहील आवडत्या लोकांचा सहवास लाभेल. बुद्धीचातुर्याने व तर्कशुद्ध विचार पद्धतीने आपण इतरांची मने जिंकून घ्याल. नाविन्यपूर्ण गोष्टी करण्याकडे आपला कल राहील. राजकीय सामाजिक क्षेत्रातून आपले वर्चस्व वाढणार आहे. कर्मस्थानातील रवी, शुक्र, बुध आणि चंद्र आपल्या व्यावसायिक उत्कर्ष पूरक राहतील. नवनवीन मोठे प्रकल्प हाती घेतले जातील. राजकारणी लोकांसाठी सत्ता गाजवून प्रतिष्ठा मिळवणे यासाठी पूरक ग्रहमान राहील. लेखक, कलाकारांना त्यांच्या कार्याबद्दल पारितोषिक मिळेल‌. अनेकांचे सहकार्य लाभेल. इच्छापूर्ती होईल.

शुभ दिनांक – 25, 26

मीन – प्रवासात आपले खिसा पाकीट सांभाळावे. कोणत्याही भूलथापांना बळी पडू नका. प्रकृतीच्या तक्रारींकडे दुर्लक्ष करू नका. समाजात बोलताना शब्द जपून वापरा अथवा एखाद्या प्रकरणात शाब्दिक चकमकीतून मनस्ताप होण्याची शक्यता राहते. कामानिमित्त प्रवास घडतील. सकारात्मक विचारांमुळे वातावरण आनंदी राहील. सरकारी कामात यश लाभेल. महत्त्वाची कागदपत्रे हाती लागतील. आपला संगीताचा शौक पूर्ण करता येईल. जुन्या गाण्यांचा आनंद घेता येईल. तरुणांना नोकरी व्यवसायासाठी चांगल्या संधी चालून येतील. उच्च शिक्षणासाठी परदेशी जाणाऱ्या विद्यार्थ्यांच्या प्रयत्नांना यश येईल.

शुभ दिनांक – 23 ते 25

• श्री बालाजी ज्योतिषालय आणि वास्तू कन्सल्टन्सी, पुणे 

9011149780 / 8668293104

टीप : या लेखातील माहिती आणि मते ही सर्वस्वी लेखकाची आहेत. क फॅक्टस टीम याची पुष्टी करत नाही. तसेच लेखकाच्या मतांशी आम्ही सहमत असू असेही नाही.