‘या’ राशींच्या लोकांवर दिसणार गुरु आणि शनीचा प्रभाव

प्रत्येकाला आपल्या आयुष्यात कोणती संकट येणार आहेत हे आधीच जाणून घेण्याची इच्छा असते. त्यामुळे हा आठवडा ‘या’ राशींसाठी कसा असेल, कोणत्या राशींवर कुठल्या ग्रहांचा प्रभाव असेल हे जाणून घेऊ…(Weekly Horoscope 12 Dec to 18 Dec)

मेष – राशी स्वामी मंगळाचे धनस्थानातून तर धनेश शुक्र आणि पराक्रमेश बुध यांच भाग्यस्थानातून भ्रमण होत आहे. आपण स्वातंत्र्यप्रिय आणि कायम उत्साहीी व्यक्तिमत्त्वाच्या असल्यामुळे नंबर एक वर राहण्याची नेहमीच इच्छा असते. आपल्या अंगी चांगले नेतृत्वगुण आहेत. या आठवड्यातील ग्रहमान आपल्या गुणांना चांगला वाव देणारे आहे. गृह सजावटीसाठी मौल्यवान वस्तूंची खरेदी केली जाईल. पाहुण्यांची सतत वर्दळ राहील. घरात शुभ समारंभाचे आयोजन केले जाईल. संततीच्या उत्कर्षीची वार्ता कानी येईल. आपल्या संभाषण चातुर्यामुळे लोकांना आपलेसे करून घ्याल. नोकरीत वरिष्ठांकडून आपल्या कामाची प्रशंसा केली जाईल. आठवड्याच्या उत्तरार्धात घडलेल्या भाग्यकारक घटनांमुळे आपल्या आनंदाला पारावर राहणार नाही.

शुभ दिनांक – 14 ते 16

वृषभ – राशीतील मंगळ आपल्या कर्तृत्वाला चांगली झळाळी देणारा राहील. पराक्रम स्थानातून चंद्राचे भ्रमण होत असल्यामुळे आपल्या कष्टाळू आणि सोशिक स्वभावाला योग्य न्याय मिळणार आहे. चतुर्थस्थानातून चंद्राचे तर अष्टमस्थानातून रवी, बुध, शुक्राचे होणारे भ्रमण स्थावर मालमत्तेतून लाभ देणारे राहील. आपल्या निश्चयी स्वभावामुळे आणि अनुकूल ग्रहमानामुळे अनेक कामे पूर्णत्वास जातील. आप्तस्वकीयांचे सहकार्य लाभेल. भविष्यकाळाच्या दृष्टीने गुंतवणूक करण्यात यश येईल. कामानिमित्त प्रवास घडतील. आपली इच्छापूर्ती होणाऱ्या घटना घडल्यामुळे मनस्वास्थ लाभेल. नोकरी व्यवसायात आपण केलेल्या उत्तम व्यवस्थापन कौशल्यामुळे आपले कौतुक केले जाईल.

शुभ दिनांक – 17, 18.

मिथुन – आठवड्याच्या सुरुवातीला आपल्या राशीच्या धनस्थानातून धनेश चंद्राचे भ्रमण होत आहे, तर सप्तम स्थानातून बुध, शुक्राचे भ्रमण होत आहे. आपल्या विनोदी स्वभावामुळे इतरांना आपलेसे करून घ्याल, आणि आपली मते पटवून देऊन त्याची पूर्तता कराल. कुटुंबात आपले वर्चस्व राहणार आहे. नोकरी व्यवसायातील कामानिमित्त प्रवास करून येतील. भावंडांचे सहकार्य लाभेल. उत्तरार्धात कुटुंबात शुभ समारंभाचे आयोजन केले जाईल. संत सज्जनांचा सहवास लाभेल. विवाह इच्छुक तरुणांचे विवाह ठरतील. विद्यार्थ्यांना स्पर्धा परीक्षा चांगली यश मिळवता येईल‌. सामाजिक कार्यात सक्रिय सहभाग घ्याल. नवीन जबाबदाऱ्या आनंदाने स्वीकाराल.

शुभ दिनांक – 12, 13.

कर्क – आपल्या राशीतून चंद्राचे लाभस्थानातून मंगळाचे तर षष्ठस्थानातून रवी, बुध आणि शुक्राचे भ्रमण होत आहे. महत्त्वाचे निर्णय घेतले जातील. कौटुंबिक जीवनात परिस्थितीप्रमाणे बदल करून सर्वांना सामावूनन घ्याल. भावनेच्या आहारी जाऊन कोणतेही निर्णय घेऊ नका. समोर आलेली परिस्थितीच आपल्याला सर्व जबाबदारीची जाणीव करून देणारी राहील. कौटुंबिक शुभ समारंभात सहभागी व्हाल. परदेशस्थ भावंडांच्या गाठीभेटी होतील. नवीन संधी चालून येतील. प्रवासातून लाभ होतील.

शुभ दिनांक – 12, 13

सिंह – आपल्या राशीच्या कर्मस्थानातून मंगळाचे तर व्ययस्थानातून चंद्राचे भ्रमण होत आहे. नोकरी व्यवसायातील कामानिमित्त परदेशी जाण्याचे योग येतील. अत्याधुनिक यंत्रसामग्रीचा व्यवसायात वापर कराल. समोर आलेल्या संधीचे सोने कराल. सतत कामात व्यस्त रहाल. सामाजिक, राजकीय क्षेत्रात आपणास नावलौकिक मिळेल. कुटुंबात आपल्या मतांचा आदर केला जाईल. उत्तम नेतृत्वशक्तीमुळे व अतिशय स्थिर बुद्धीने निर्णय घेतल्यामुळे कामे पूर्णत्वास जातील. आठवड्याच्या उत्तरार्धात पंचमस्थानातील रवी, बुध व शुक्र आपणास अनुकूल फलदायी ठरतील.

शुभ दिनांक – 14 ते 16

कन्या – लाभस्थानातून चंद्राचे होणारे भ्रमण सामाजिक, राजकीय क्षेत्रात आपली प्रतिष्ठा उंचावणारे राहील. मित्र परिवारास सहकार्य कराल. करमणुकीच्या कार्यक्रमातून आनंद मिळवाल. लेखकांच्या हातून दर्जेदार लिखाण होईल. आपल्या चिकित्सक, चौकस स्वभावामुळे नाविन्यपूर्ण कल्पना यशस्वीपणे अंमलात येतील. आपल्या वाक् चातुर्याच्या जोरावर मोठी मजल माराल. सुखस्थानातील रवी, बुध व शुक्रामुळे कुटुंबातील वातावरण आनंदी, उत्साही राहील. अंगभूत कलागुणांना चांगला वाव मिळेल. आठवड्याच्या उत्तरार्धात धार्मिक स्थळांना भेटी द्याल.

शुभ दिनांक – 17, 18

तूळ – आपल्या राशीच्या कर्म स्थानातून चंद्राचे भ्रमण होत आहे. आपल्या कामाला आपण योग्य न्याय द्याल. उत्तम बुद्धिमत्ता आणि दूरदर्शीपणा यामुळे आपल्याला यश प्राप्त होईल. नवीन कल्पना आकार घेतील. नवनवीन व्यावसायिक उपक्रम राबवले जातील. सहकाऱ्यांची चांगली साथ लाभेल. आपले ध्येय गाठू शकाल. आजवर रेंगाळलेली सहकारी कामे चिकाटीने पूर्णत्वास नेता येतील. आठवड्याच्या उत्तरार्धात आपल्या अंगभूत कलागुणांना चांगला वाव मिळेल. कामानिमित्त प्रवास घडून येतील.

शुभ दिनांक – 12, 13

वृश्चिक – आठवड्याच्या पूर्वार्धात दशमेश रवीचे आपल्या राशीतून होणारे भ्रमण आपला आत्मविश्वास वाढणारे राहील. धाडसी निर्णय घेतले जातील. नोकरीत वरिष्ठांकडून आपल्या कामाची प्रशंसा केली जाईल. बढती बदलीचे योग संभवतात. आपला वैयक्तिक भाग्योदय होण्याच्या दृष्टीने या आठवड्यातील ग्रहमान अतिशय अनुकूल राहील, त्यामुळे समोर आलेल्या संधी स्वीकारा. विद्यार्थ्यांना स्पर्धा परीक्षातून यश लाभेल. उच्च शिक्षण घेण्यासाठी घरापासून दूर राहण्याचे योग येतील. आपल्या कर्तव्याला प्राधान्य द्याल. जुन्या मैत्रीला उजाळा मिळेल. आपल्या मतांचा आदर केला जाईल.

शुभ दिनांक -12 ते 14

धनु – राशीतील बुध शुक्रमुळे गोड बोलून आपली कामे पूर्ण कराल. अष्टमातून चंद्राचे होणारे भ्रमण अनपेक्षित अर्थप्राप्ती दर्शवते. जोडीदाराला नोकरीत बढतीचे योग येतील. स्थावर मालमत्तेच्या व्यवहारातून लाभ होतील, मात्र कोणत्याही भुलथापांना बळी पडू नका. कामाचा व्याप वाढल्यामुळे सतत कार्यरत राहाल. तेव्हा प्रकृतीच्या तक्रारींकडे दुर्लक्ष करू नका. व्यवसाय उद्योगात महत्त्वाचे निर्णय घ्यावे लागतील. कामानिमित्त प्रवास घडून येतील. अध्यात्मिक प्रगती होईल. धार्मिक स्थळांना भेटी द्याल. आपल्या अंगभूत कलागुणांना चांगला भाव मिळेल.

शुभ दिनांक – 16 ते 18

मकर – आठवड्याच्या सुरुवातीला आपल्या राशीच्या सप्तमस्थानातून चंद्राचे भ्रमण होत आहे.जोडीदाराच्या उत्कर्षाची वार्ता कानी येईल. भागीदारी व्यवसायातून नवीन कार्यारंभ केले जातील. नव्या कल्पना आकार घेतील. स्वच्छंद आचार विचार आणि मेहनत करण्याच्या आपल्या वृत्तीमुळे आपण अतिशय अवघड कामे देखील सहजतेने पूर्ण करता. या आठवड्यात आपल्याला याची प्रचिती येणार आहे. वाहन चालवताना वाहनाच्या वेगावर नियंत्रण ठेवावे. प्रकृतीच्या तक्रारींकडे दुर्लक्ष करू नका. उत्तरार्धात धार्मिक स्थळांना भेटी दिल्या जातील. आप्तस्वकीयांच्या गाठीभेटी होतील.

शुभ दिनांक – 17, 18

कुंभ – आपल्या राशीच्या षष्ठस्थानातून चंद्राचे भ्रमण होत आहे. नोकरीत स्त्री अधिकाऱ्यांचे सहकार्य लाभेल. आपल्या कामाची प्रशंसा केली जाईल. आपले धाडस, उत्तम निर्णयशक्ती यांच्या जोरावर मोठी मजल माराल. संशोधनपर अभ्यासक्रमात यश लाभेल. नवीन जबाबदाऱ्या स्वीकाराव्या लागतील. जोडीदाराचे चांगले सहकार्य लाभेल. जुनी येणी वसूल होतील. शुभ समारंभात सहभागी व्हाल. अध्यात्मिक उन्नती होईल. लेखकांच्या हातून दर्जेदार लिखाण होईल. आपल्या कर्तृत्वाला चांगली झळाळी मिळेल. उत्तरार्धात अनोळखी व्यक्तीच्या सल्ल्याने कोणताही निर्णय घेऊ नका.

शुभ दिनांक – 14 ते 16

मीन – पंचमस्थानातील कर्क या स्वराशीतून चंद्राचे भ्रमण होत आहे. अनपेक्षित धनलाभ होऊ शकतो, अथवा नोकरी – व्यवसायातील जुनी येणी अचानकपणे हाती येतील. करमणुकीच्या कार्यक्रमातून आनंद मिळवाल. आपल्या अंगभूत कलागुणांना चांगला वाव मिळेल. आपल्या मतांचा आग्रह धरल्यास वादंग उद्भवू शकतात. त्यामुळे आपली मते इतरांवर लादू नका. भावंडांच्या गाठीभेटी होतील. विवाहेच्छूक तरुणांना मनपसंत जोडीदार मिळेल. नवपरिणीतांना गोड बातमीची चाहूल लागेल. कुटुंबातील वातावरण आनंदी, उत्साही राहील. धार्मिक शुभ समारंभात सहभागी व्हाल.

शुभ दिनांक – 17, 18

• श्री बालाजी ज्योतिषालय आणि वास्तू कन्सल्टन्सी, पुणे 

9011149780 / 8668293104

टीप : या लेखातील माहिती आणि मते ही सर्वस्वी लेखकाची आहेत. क फॅक्टस टीम याची पुष्टी करत नाही. तसेच लेखकाच्या मतांशी आम्ही सहमत असू असेही नाही.