भाज्या आपल्या आयुष्याच्या अविभाज्य भाग आहे. दररोज आपण जेवणामध्ये विविध प्रकारच्या भाज्या खातो. आपलीकडे अनेक प्रकारच्या भरपूर भाज्या मिळतात आणि प्रत्येक भाजी बऱ्याच प्रकारे बनवता येते. त्यामुळे आपल्याला एकच भाजी अनेक प्रकारे खाता येते. मात्र असे असले तरी आपल्या सर्वांनाच सगळ्या भाज्या आवडता असे नाही.
भाज्यांचे पर्याय असंख्य असले तरी सगळ्यांना मोजक्याच भाज्या आवडतात. त्या देखील विशिष्ट पद्धतीने बनवलेल्या. मग अशातच जर घरात कोणी दुधी भोपळा आणला किंवा या भाजीचे नाव जरी काढले तरी सगळ्यांची नाकं मुरडली जातात आणि कपाळावर आठ्या येऊन तोंडातून नको……….येते. दुधी ही भाजी जवळपास सगळ्यांनाच न आवडणारी आहे. काही लोकं तर एकवेळ कारलं खातील पण दुधी नाही असे असतात. मात्र हीच दुधी आपल्या शरीरासाठी आणि आरोग्यसाठी वरदान आहे.
दुधीमध्ये असे अनेक गुणधर्म आहेत, ज्यांमुळे आपल्या शरीराला आणि आरोग्याला मोठे लाभ मिळतात. दुधी भोपळ्याला आयुर्वेदिक औषधी गुणांमुळे विशेष महत्त्व प्राप्त झाले आहे. यात लोह, कॅल्शियम, फॉस्फरस व अन्य खनिजे तसेच क जीवनसत्व आहे. आरोग्याच्या अनेक समस्यांपासून सुटका मिळवण्यासाठी दुधी भोपळा खाण्याचा सल्ला दिला जातो.
आयुर्वेदानुसार दुधी भोपळ्यामध्ये थायमिन, रिबोफ्लेविन, मिनरल्स, फॉस्फरस आणि सोडियम मुबलक प्रमाणात आढळतात. ज्यामुळे व्यक्ती निरोगी राहण्यास मदत होते. वजन कमी करण्यापासून ते पचनासाठी दुधी खूप उपयुक्त आहे. दुधी खाल्ल्याने आरोग्य तंदुरुस्त राहते. छातीत जळजळ, शरीरात पाण्याची कमतरता, उष्णतेमुळे चक्कर येणे, धाप लागणे अशा अनेक समस्यांवर दुधी भोपळा फायदेशीर आहे. जाणून घेऊया दुधी खाण्याचे महत्त्वाचे फायदे.
– हृदयाला निरोगी ठेवण्यासाठी दुधी भोपळा खूप फायदेशीर आहे. आठवड्यातून तीन वेळा दुधी भोपळ्याचा रस पिल्याने तुमचे हृदय निरोगी राहते. यासह, आपले रक्तदाब देखील नियंत्रित राहते.
– दुधी भोपळ्याचा रस तुमचे वजन कमी करण्यासही मदत करते. लोह, जीवनसत्त्वे आणि पोटॅशियम समृद्ध आहे. रोज दुधी भोपळ्याचा रस घेतल्याने वजन कमी होते.
– आजकाल वाढत्या प्रदूषणामुळे लोकांचे केस अकाली पांढरे झाले आहेत. या प्रकरणात, आपण दररोज एक ग्लास दुधी भोपळ्याचा रस घेऊ शकता. हे आपल्या केसांचा रंग आणि पोत अखंड ठेवेल.
– दुधी भोपळ्याचे अनेक फायदे आहेत. मूळव्याधाच्या आजारावरदेखील दुधी उपयोगी पडतो. त्यासाठी दुधी भोपळ्याचे साल सुकवून त्याचा बारीक भुगा बनवून घ्या. आणि रोज सकाळी – सायंकाळी एक चमचा थंड पाण्यासोबत सेवन केल्याने फायदा मिळेल.
– दुधी भोपळा पोटाच्या विकारांवरही खूप फायदेशीर ठरतो. दुधी भोपळ्याला मंद आचेवर भाजून त्याचा भरीत बनवा. त्यातील रस पिळून काढून त्यामध्ये थोडी साखर घालून प्यायल्यामुळे लिव्हर आणि पोटाच्या विकारांवर फायदा होता.
– यकृताचे आरोग्य चांगले ठेवण्यासाठी दुधी उत्तम आहे. वारंवार पचनाचा त्रास होत असल्यास भोपळा खाण्याचा सल्ला अनेकजण देतात. तसेच यातील पोटॅशियम किडनीच्या आरोग्यासाठी चांगले असते.
– फायबरसोबतच व्हिटॅमिन बी, सी, ए, के, ई, लोह आणि मॅग्नेशियम यांसारखे अनेक पोषक घटक दुधी भोपळ्यामध्ये असतात. जे वजन कमी करण्यास मदत करते. वजन लवकर कमी करायचे असेल तर तुम्ही रोज सकाळी रिकाम्या पोटी दुधी भोपळ्याचा रस पिऊ शकता.
– दुधी भोपळ्यामध्ये फायबर आणि फॅटचे प्रमाण कमी असल्याने पचनसंस्था निरोगी राहते आणि शरीरातील ऊर्जेची पातळीही व्यवस्थित राहते.
– दुधी आहारात घेतल्याने हाडे मजबूत होतात. कारण त्यात कॅल्शियम, मॅग्नेशियम आणि झिंक सारखे पोषक घटक आढळतात, हाडांच्या आरोग्यासाठी त्याचा फायदा होतो.
– बदलत्या जीवनशैलीत बहुतेक लोक ताण-तणावाखाली काम करत असतात. त्यामुळे अनेक आजार सुरू होऊ शकतात. तुम्हाला कदाचित विश्वास बसणार नाही, मात्र, दुधी खाल्ल्याने तणाव देखील कमी होतो.
– शरीरात युरिक अॅसिडचे प्रमाण वाढल्याने त्रास होऊ शकतो. या समस्येपासून सुटका मिळवण्यासाठी तुम्ही दुधी भोपळ्याच्या रसाचे सेवन करू शकता. दुधी भोपळ्यात व्हिटॅमिन बी, व्हिटॅमिन सी आणि लोह यासारखे अनेक पोषक घटक आढळतात. त्याचा रस रिकाम्या पोटी प्यायल्यास युरिक अॅसिडची पातळी कमी होण्यास मदत होते.
(टीप : कोणतेही उपाय करण्यापूर्वी तज्ज्ञांचा किंवा डॉक्टरांचा सल्ला घ्या.)
