काशीमध्ये बाबा विश्वनाथाच्या चरणी लीन होण्यासाठी महाशिवरात्रीच्या दिवशी लाखो भाविकांनी गर्दी केली होती. त्यासोबत वाराणसीमध्ये अजून एक उत्सव सुरु झाला, तो म्हणजे, होळीचा. वाराणसीमध्ये जशी महाशिवरात्रीला भक्तांची गर्दी होते, तशीच गर्दी मसान होळीलाही होते. या दिवशी मणिकर्णिका घाटावर हजारो नागा साधू जमतात, आणि ही मसान होळी साजरी करतात. उत्तर प्रदेशातील ही होळी जगभर प्रसिद्ध आहे. येथे, होळीच्या काही दिवस आधी, विश्वनाथ मंदिर आणि मणिकर्णिका घाटावर चितेच्या राखेसह होळी खेळली जाते. यालाच मसान होळी असे म्हटले जाते. या मसान होळीसाठी काशीच्या घाटावर अनेक नागा साधू दाखल झाले आहेत. यंदा ही मसान होळी 11 मार्च रोजी साजरी होणार असून यावेळी नागा साधूंची भव्य मिरवणूकही होणार आहे. हा सर्व सोहळा बघण्यासाठी या भागात मोठ्या संख्येनं भाविक दाखल झाले आहेत. (Masan Holi)
दरवर्षी काशीमध्ये होळीचा सण एका वेगळ्या परंपरेने साजरा केला जातो. येथील मसान होळीसाठी मोठी गर्दी होते. यावेळीही या मसान होळीआधीच मोठ्या संख्येनं नागा आणि अघोरी साधू काशीच्या घाटावर जमले आहेत. बनारसमध्ये रंगभरी एकादशीला बाबा विश्वनाथ भक्तांसोबत होळी खेळून रंगांच्या उत्सवाची सुरुवात करतात. यानंतर काशीचे नागरिक आणि नागा साधू मणिकर्णिका घाटावर गर्दी करतात. यावेळी मसान होळीनिमित्त, नागा साधू भस्म उत्सव साजरा करतात. यावेळी प्रत्यक्ष बाबा विश्वनाथही उपस्थित असतात, अशी भक्तांची भावना असते. (Social News)
गेल्या दोन महिन्यापासून वाराणसीमध्ये भक्तांचा पूर आल्यासारखी परिस्थिती आहे. प्रयागराज येथे चालू असलेल्या महाकुंभमधून करोडो भाविक, बाबा विश्वनाथाच्या नगरीत दाखल झाले. त्यातच महाशिवरात्रीला येथे आलेल्या भाविकांच्या संख्येनं नवीन विक्रम केला आहे. आता अशीच गर्दी बाबांच्या मसान होळीला होणार आहे. 11 मार्च रोजी साजरी होणा-या या मसान होळीची परंपरा खूप जुनी आहे. पौराणिक कथेनुसार, रंगभरी एकादशीच्या दिवशी गौण विधीनंतर महादेव देवी पार्वतीला काशीला घेऊन आले होते. त्यावेळी भगवान शंकर सर्वांसोबत गुलालाने होळी खेळले. पण भूत, आत्मे, प्राणी हा सण साजरा करू शकत नव्हते. म्हणून भगवान शंकर रंगभरी एकादशीच्या दुसऱ्या दिवशी मसानची होळी खेळले. (Masan Holi)
तेव्हापासून चितेच्या राखेसह मसान होळी साजरी करण्याची परंपरा सुरू झाली असे मानले जाते. या मसान होळीमागे आणखी एक कथा सांगितली जाते, त्यानुसार यमराजाचा पराभव केल्यानंतर भगवान भोलेनाथांनी चितेच्या राखेने याच मणिकर्णिका घाटावर होळी साजरी केली. तेव्हापासून येथे मसान होळी खेळली जाते. हा उत्सव येथे दोन दिवस साजरा होतो. पहिल्या दिवशी लोक चितेची राख गोळा करतात आणि दुसऱ्या दिवशी त्याच राखेने होळी खेळतात. मृत्युवरील विजयाचे प्रतीक म्हणून ही होळी काशीचे नागरिक साजरी करतात. मसान होळी ही भगवान शंकर यांना समर्पित आहे. या मसान होळीसाठी देशभराच्या कानाकोपऱ्यातून नागा साधू काशीमध्ये दाखल झाले आहेत. नागा साधू या मसान होळीपर्यंत काशीच्या घाटावर रहातात आणि भगवान शंकराची आराधना करतात. या मसान होळीनंतर हे सर्व नागा साधू केदारनाथकडे रवाना होतात. (Social News)
=============
हे देखील वाचा : Indrajeet Sawant : मार्टिनची डायरी आणि कोरटकर-सावंत वाद का घडला ?
Japan : जपानी राजघराण्याचे अस्तित्व धोक्यात !
=============
महाशिवरात्रीच्या आधीपासूनच होळीची तयारी या बाबा विश्वनाथाच्या नगरीत सुरु झाली आहे. 24 फेब्रुवारी रोजी श्री काशी विश्वनाथ मंदिराच्या माजी महंतांच्या निवासस्थानापासून पारंपारिक लोकोत्सवाची तयारी सुरू झाली. त्यानंतर रंगभरी एकादशीला हा उत्सव सुरु होईल. काशीमध्ये एकूण 40 दिवस होळी खेळली जाते. त्यापैकी रंगभरी एकादशीचा दिवस महत्त्वाचा असतो. याच रंगभरी एकादशीला म्हणजेच, 11 मार्च रोजी हजारो नागा साधू मणिकर्णिका घाटावर हजर होतात. आणि चितेच्या राखेनं होळी साजरी करतात. याआधी काशी विश्वनाथ मंदिराच्या माजी महंतांच्या निवासस्थानी बाबांच्या चांदीच्या मूर्तीसमोर हळदीच्या तेलाचा विधी झाला. यात महादेवाला हळद लावली गेली, आणि शिव-पार्वतीचा विवाह 26 फेब्रुवारी रोजी महाशिवरात्रीला साजरा झाला. आता 7 मार्च रोजी गौरी मातेचा हळदीचा विधी होईल. 8 मार्च रोजी मंगल शगुन, 9 मार्च रोजी गौरा सदनिका येथे बाबांचे आगमन आणि 10 मार्च रोजी पालखी यात्रा होईल. त्यानंतर 11 मार्च रोजी हर हर महादेव या जयघोषात मणिकर्णिका घाटावर मसान होळी खेळली जाईल. (Masan Holi)
सई बने
