चीनमध्ये राष्ट्राध्यक्ष शी जिनपिंग यांच्या हत्येचा कट रचण्यात आल्याची माहिती पुढे आली आहे. पीपल्स लिबरेशन आर्मीमधील प्रमुख जनरलपैकी एक असलेले झांग युक्सिया यांनी संरक्षण विषयक गुप्त माहिती अमेरिकेला दिल्याचा संशय आहे. सोबतच अमेरिकेची गुप्तचर संघटना सीआयएशी हातमिळवणी करुन झांग युक्सिया हे शी जिनपिंग यांना हटवण्याचा प्रयत्न करत असल्याचेही उघड झाले आहे. हा कट उघड झाल्यावर झांग आणि लष्करातील आणखी एका वरिष्ठ अधिका-याला अटक कऱण्यात आली आहे. ( Xi Jinping )
या दोघांचीही चौकशी सुरु असून त्यातून उघड झालेल्या माहितीमुळे चीनमध्ये खळबळ उडाली आहे. सोबतच शी जिनपिंग यांचा सर्वात विश्वासू साथीदार असलेल्या झांग यांनी हा विश्वासघात का केला, याची चर्चाही सुरु झाली. यातून एक नाव पुढे आलं, ते म्हणजे, शी मिंगझे. शी मिंगझे, ही शी जिनपिंग यांची एकुलती एक मुलगी आहे. सध्या चीनच्या सामाजिक संस्थांमध्ये व्यस्त असलेली शी मिंगझे ही चीनची राजकुमारी म्हणून ओळखली जाते. आता हीच राजकुमारी चीनच्या राजकारणात प्रवेश करणार असल्याची माहिती आहे. शी जिनपिंग आपला उत्तराधिकारी म्हणून शी मिंगझेचे नाव घोषित कऱण्याची शक्यता आहे.
वास्तविक शी जिनपिंग यांच्यानंतर चीनच्या सत्तेमध्ये झांग युक्सिया यांचा दावा होता. पण शी मिंगझेच्या प्रवेशामुळे आपला चीनच्या अध्यक्षपदावरचा दावा कमकुवत होणार असल्याची जाणीव झांग यांना झाली. त्यातूनच झांग यांनी अमेरिकेच्या सीआयएला सोबत घेऊन थेट शी जिनपिंग यांची सत्ता उलथवून टाकण्याचा कट रचल्याचे आता उघड होत आहे. या सर्वात शी मिंगझे हिचा चीनच्या राजकारणातला पुढचा प्रवास किती खडतर असणार आहे, याची चर्चाही सुरु झाली आहे. चीनच्या राजकारणात मोठ्या घडामोडी होत आहेत. एकीकडे अध्यक्ष शी जिनपिंग यांच्या हत्येचा कट रचल्याचा आरोप करून झांग युक्सिया या वरिष्ठ लष्करी जनरलला अटक कऱण्यात आली आहे. तर दुसरीकडे शी जिनपिंग यांची एकुलती एक लेक असलेल्या शी मिंगझेचा चीनच्या राजकारणात प्रवेश होत आहे. ( Xi Jinping )
शी जिनपिंग हे सध्या ७२ वर्षाचे आहेत. २०१२ पासून चिनी कम्युनिस्ट पक्षाचे सरचिटणीस आणि केंद्रीय लष्करी आयोगाचे अध्यक्ष म्हणून त्यांनी जबाबदारी सांभाळली आहे. २०१३ पासून चीनचे अध्यक्ष म्हणून शी जिनपिंग यांच्याकडे पदभार आहे. अशात शी जिनपिंग वाढत्या वयामुळे सत्ता कोणाकडे सोपवणार अशी चर्चा सुरु झाली आहे. यातूनच शी मिंगझेचे नाव पुढे आले आहे. चीनच्या राजकारणात २०२७ हे वर्ष महत्त्वाचे आहे. कारण चिनी कम्युनिस्ट पक्षाची २१ वी राष्ट्रीय काँग्रेस याच वर्षात होणार आहे. यामध्ये पक्षाची नवीन केंद्रीय समिती निवडली जाणार आहे. ही केंद्रीय समिती मोठी जबाबदारी पार पाडते. केंद्रीय समिती केंद्रीय लष्करी आयोगाच्या सदस्यांचीही नियुक्ती करते. या सर्वांचा चीनच्या सत्तेमध्ये मोठा वाटा असतो, तसेच प्रशासनावरही याच सर्वांचा प्रभाव असतो.
गेल्या काही महिन्यापासून चीनमध्ये होत असलेल्या अधिकाऱ्यांवर कारवाईचा आणि या केंद्रीय समितीचा संबंध असल्याची चर्चा आहे. शी जिनपिंग यांनी सत्ता ताब्यात घेतल्यावर सुरुवातीपासून भ्रष्टाचाराबाबत कडक भूमिका स्विकारली आहे. कम्युनिस्ट पक्षामध्ये स्थानिक पातळीवर नेतृत्व बदल करणे गरजेचे असल्याचे मत शी जिनपिंग यांनी व्यक्त केले आहे. नवीन पिढीला अशा पक्षात सामावून घेतांना भष्ट्राचारी नेत्यांना वेळीच अटकाव केला पाहिजे, यासाठी शी जिनपिंग आग्रही आहेत. हे सर्व शी जिनपिंग आपली मुलगी शी मिंगझे हिचा पक्षातील प्रवास अधिक सुकर व्हावा यासाठी करत असल्याचेही सांगितले. ( Xi Jinping )
=======
हे देखील वाचा : Zhang Youxia : शी जिनपिंग यांच्या जीवाला सहकार्यांकडूनच धोका
=======
२५ जून १९९२ रोजी चीनमधील फुजियान प्रांतातील फुझोऊ शहरात शी मिंगझे हिचा जन्म झाला आहे. तिने तिचे सुरुवातीचे शिक्षण बीजिंग जिंगशान शाळेत घेतले. शी मिंगझे ही चीनच्या मॅंडरिनसोबत अनेक भाषांची अभ्यासक आहे. २०१० मध्ये, मिंगझेने अमेरिकेतील हार्वर्ड विद्यापीठात टोपणनावाने प्रवेश घेतला. तिथे तिने मानसशास्त्राचा अभ्यास केला आणि २०१४ मध्ये कला शाखेची पदवी मिळवली. यासोबत शी मिंगझे ही सामाजिक कार्यात व्यस्त राहिली आहे.
२००८ च्या सिचुआन भूकंपानंतर, तिने मियांझूच्या हानवांग भागातील मदत कार्यात तिचा मोठा सहभाग होता. सध्या शी मिंगझे आपल्या वडिलांच्या मार्गदर्शनाखाली चीनच्या राजकारणाचा अभ्यास करत आहे. अनेकवेळा शी मिंगझे सामाजिक कार्यक्रमात दिसत असल्यामुळेच ती लवकरच चीनच्या कम्युनिष्ट पक्षाचा नवा चेहरा होणार असल्याचीही चर्चा आहे. शी मिंगझे हिच्या प्रवेशामुळे नाराज असलेल्या झांग यांना अमेरिकेच्या सीआयएनं आपल्या जाळ्यात ओढले, आणि त्यांच्याकडून लष्कराची गुपितं मिळवली आहेत. या सर्वात शी जिनपिंग हे प्रकरण कसे हाताळत आहेत, यावरच त्यांच्या मुलीचे चीनच्या राजकारणातील भवितव्य ठरणार आहे. ( Xi Jinping )
सई बने
