Parenting Tips : आजच्या डिजिटल युगात मोबाईल फोन हा जीवनाचा अविभाज्य भाग बनला आहे. मोठ्यांसोबतच लहान मुलांचाही त्यावर प्रभाव पडलेला दिसतो. शिक्षण, करमणूक आणि संवाद या सर्व गोष्टी मोबाइलद्वारे शक्य झाल्या असल्या तरी, लहान वयातच मोबाईलची अति सवय ही शारीरिक, मानसिक आणि सामाजिक दृष्टीने हानिकारक ठरू शकते. पालकांच्या सुलभतेसाठी मुलांना फोन हातात देणं सोपं वाटतं, पण नंतर ही सवय त्यांच्यासाठी व्यसनासारखी ठरते. सतत स्क्रीनसमोर राहिल्याने मुलांचे डोळे कमकुवत होतात, झोपेचे चक्र बिघडते, संवाद कौशल्य कमी होते आणि त्यांच्या एकूणच विकासावर नकारात्मक परिणाम होतो. त्यामुळे या सवयीवर नियंत्रण ठेवणे गरजेचे आहे आणि यासाठी पालकांनी काही ठोस उपाय योजले पाहिजेत.
सर्वप्रथम, मुलांना मोबाईल का वापरायचा आहे याचे कारण समजून घ्या. जर शिक्षणासाठी वापरत असतील, तर त्यासाठी ठराविक वेळ आणि अ‍ॅप्सची निवड करा. करमणुकीसाठी वापरत असतील, तर त्याची मर्यादा आखा. मोबाईलचा पर्याय म्हणून त्यांना शारीरिक खेळ, गोष्टींचे पुस्तक, पझल्स, पेंटिंग यासारख्या गोष्टींमध्ये गुंतवून ठेवा. मुख्य म्हणजे, त्यांच्यासोबत वेळ घालवा. अनेकदा मुलं मोबाईलमध्ये गुंततात कारण त्यांना एकटं वाटतं किंवा त्यांना संवादाची गरज असते.
Parenting Tips
दुसरं महत्त्वाचं पाऊल म्हणजे ‘उदाहरण देणं’. पालकच जर सतत फोनमध्ये गुंतलेले असतील, तर मुले तेच शिकतात. त्यामुळे, जेव्हा तुम्ही मुलांसोबत असता, तेव्हा फोन बाजूला ठेवा. जेवताना, खेळताना, झोपताना मोबाईल पूर्णतः दूर ठेवा आणि हीच सवय मुलांमध्ये रुजवा. घरात ‘नो फोन झोन’ जाहीर करा – जसे की डायनिंग टेबल, झोपण्याची वेळ इत्यादी.
=======================================================================================================
हेही वाचा :
नात्यात सतत भांडण होत असेल तर तोडगा कसा काढावा?
Mother’s Day : मदर्स डे चा इतिहास आणि त्याची सुरूवात कशी झाली?
=======================================================================================================
तसेच, मोबाईल वापराची ठराविक वेळ निश्चित करा. उदाहरणार्थ, दररोज 30 मिनिटे निवडलेल्या अ‍ॅप्सवर किंवा व्हिडिओवर वापर करण्याची मुभा द्या. पण त्यानंतर मोबाईल बाजूला ठेवायला त्यांना प्रोत्साहित करा. वेळेचे पालन केल्यास त्यांना छोट्या बक्षिसांची घोषणा करू शकता – जसे एकत्र पिकनिक, त्यांना हवे असलेले खेळ, चित्रपट इत्यादी. हे प्रेरणादायक ठरते.(Parenting Tips)
शेवटी, मुलांसोबत खुल्या संवादात राहा. त्यांना मोबाईलचे फायदे आणि तोटे समजावून सांगा. त्यांची अडचण ऐका आणि त्यांना योग्य मार्गदर्शन द्या. मोबाईलपासून दूर राहण्यासाठी पालकांचा संयम, सातत्य आणि प्रेमपूर्वक शिस्त अत्यंत आवश्यक आहे. अशी सवय सुटण्यासाठी वेळ लागतो, पण योग्य मार्गाने प्रयत्न केल्यास परिणाम नक्कीच मिळतो.
